[صـــبا نـــجد]

قصيدة المعلمه سارة يوم شافت حبيبها جاي يسجل بنته



يانوره بالله اسمعي لاتصدين
يابنت حرن مركزه بالصداره
شي جرالي قسم القلب قسمين
وابلا ملامه افهمي للعبارة
باول دوام المدرسه يوم الأثنين
معلمه في وجه باب الأداره
وقفت باللجنه على سادس اثنين
مثل المجند ينتظر للأشاره
هاذي تنادي وهاذي ابله انا وين
زحمه وتو اليوم بأول نهاره
اصوت لثنتين وبيدي ثنتين
نوره مضاوي عايشه مي ياره
وسمعت صوتن رجع القلب لسنين
صوت الذي اسمه بنقش السواره
اختي عن اذنش ناقل البنت هالحين
تفضلي الأوراق والأستماره
عجزت لا اجاوب ولا ارمش العين
طول سكوتي وهو طال انتظاره
حسيت ان الدم مثل البراكين
شريان قلبي وصل حد انفجاره
ورفعت راسي وصارت العين بالعين
ولمحت في عينه سواة الشراره
هو هو والا واهمه يامسلمين
زوله ورفعة حاجبه مع سماره
لا ماتغير فيه ياكود شيين
حف الشنب والشيب زاد بوقاره
اتلا علاقتنا ثلاثه وتسعين
باول حلاة العمر قبل انكساره
الشاهد الله ماحصل بيننا شين
ولا يخدش احساس بنت وعذاره
نعم الحبيب اللين الطيب الزين
ونعم الرفيق اللي حفظ حق جاره
ياوجه ابوي الوجه مرحب وسهلين
لا يابعد روح ومعاليق ساره
ودي المه وودي اصيح بس وين
مثل الكسير اللي نشب وسط غاره
مايستطيع المشي من دون رجلين
وحوله جنودن تشتهر بالشطاره
ياللأسف هالحين صرنا غريبين
حكم القدر واصدر علينا قراره
الهم والغربال والفقد والبين
وانا اسيره تنتظر للزياره
ويلي على لاماك ويلاه ياحسين
يامن يجمعنا واسوق البشاره
ساره وسكت له لحظه كنها سنين
واقفا واشوفه يوم شب الزقاره

رد حسين على قصيده معشوقته القديمه ساره

يامرحبا ياغايتي ياهلاوين
يابنت عودن فيه طيب ونعاره
لا يابعد كل البنات المزايين
يافرحت المظلوم يوم انتصاره
من يوم ماغبتي وانا ماني بزين
ضايق واحس القلب طال انتظاره
دايم على بالي وانتي تمرين
واقول يفدوها جميع العذاره
لو الليالي ترجع لعشرة اسنين
ماكان شفتي الشيب زاد بوقاره
لا مانسيتك من ثلاثة وتسعين
وشلون ابنسى حب واضح مساره
تدرين شاللي هزني يوم الأثنين
واللي ذبح قلبي بأول نهاره
زولك لمحته يوم كنتي تمشين
بين الصفوف اقبال باب الأداره
وفز الخفوق وقلت ياربي تعين
هي هي ولاهي شبيهه لساره
جيتك وقلت ابنقل البنت هالحين
تفضلي الأوراق والأستماره
طول سكاتك والبلا العين بالعين
ضقت واحس بضغط مدري حراره
وخانتني الدمعه وطاحت من العين
كني طفل يبكي مضيع دياره
بحط بنتي عندك بسادس اثنين
عشان اكثر جيتي بالزياره
واليا دخلت الصف لازم تخشين
اسمي لانه مسجلن بالسواره
وامانتك انك عليها تخافين
لحدن يضايقها بأيت عباره
بصارحك في شي يمكن تحسين
ان الزمن اقفى علينا قطاره
انا سمعت ان اكبر عيالك حسين
وانتي اكيد انك سمعتي بساره

وهذا رد من وحده مرت بنفس الموقف اللي مروا فيه حسين وسارة




تنصحهم قائلة








تكفين ياساره وقوليه لحسين



كثراللقا للقلب سبة دماره

قبل المفارق كنتوا بس انتم إثنين

واليوم كلن تارس الله داره
صدوا ترى بعض الجفا للغلا زين
إسأل مجرب مايبيله شطاره
انا عشقت اللي عطاني براهين
شخصن خذا درع الوفا وبجداره
اغليه اغلا من غلاتي لهالعين
واشتاق له شوق الاسير لدياره
قصة غلانا قاربت تسعة إسنين
بس إنتهت ياللاسف وبمراره
اتلى العهد به كان في مطلع الفين
يومن كلن شاف دربه وساره
هذاك شخصن مانسيته لهالحين
حبه ملكني بكل معنى العباره
عندي صغيرن يحمل إسمه وبه زين
اغليه من بد الوراعين واختاره
وساقتني الصدفه بعد عدة إستين
شفته وهو واقف على باب جاره
كنه غرز في داخل القلب سكين
والشوق ولع في خفوقي شراره
وكررتها مره ومره وثنتين
وهو ينتظرني بالوله عند داره
ماغير امر وتنظر العين للعين
تجرح خفوقي نظرته وإنتظاره
كثر اللقا ماينفع القلب ياحسين
كنت احسبه يشفي غليل الحياره
بس اللقا دمر خفوقي لنصفين
نصفن معاه ونصف ضبع قراره
هذا شعور الحب وانتم محبين
بس العزوبي غير وتهون ناره
ببقى على ذكراه مثل الملايين
وابعد عن دروبن توصل لداره
عساه يبقى للسعاده عناوين
وجعل السلامه في حياته مناره
تكفين ياساره وابنصحك ياحسين
كثر اللقا بعد المفارق خساره

أتمنى أن يعجبكم انتقائي ,,